Pumili ka ng trabahong tutugon sa iyong hilig upang higit kang pakinabangan ng iyong bayan.
- Gregoria de Jesus

Friday, August 19, 2011

Dear Lord

Dear Lord,
Help him. Guide him.
Let him see things from a different perspective
Give him more patience- tons and tons of it
Allow him to be free from worries
For him to have a sound mindset, a contented heart and a happy soul
That would eventually lead him on making better decisions and clearer judgments.
Ikaw na 'yan, Lord.
Ikaw na.



Ikaw, Si Pepe at ang Munting Gamugamo


Matagal na kitang binalaan 
Ang paglapit sa apoy ay 'wag masyadong kahiligan
Naging bisyo mo na
ang makipaghabulan, makipagtaguan at makipagpatintero 
Sa liwanag at sa init ng umaandap- andap na ilaw

Sige ka nang sige, sugod ka nang sugod 
Kahit na napakarami nang nagbigay ng paalala
Hindi ka na humingi ng pahintulot
Basta ka na lamang umalis
Nagpatuloy sa paglipad
sa pagkampay ng 'yong mga munting pakpak

Puno ng pananabik ang damdamin
Habang umuusal ng isang panalangin
Na ang gagawin mo sana'y magbunga ng mabuti
Para sa sarili, para sa nakararami

Tangan ang talino mo't  mabuting hangarin
Baon lamang ang positibong pagtingin
Sa kasalukuyan, sa kinabukasan
Umaasang gagabayan ka ng Poong Maykapal
Na ituturo ng pagmamahal ng 'yong mga magulang at kapatid 
ang tamang landas patungo sa nais mong puntahan

Alam kong wala kang pinagsisisihan
At wala ka ni katiting mang hinanakit
Batid kong masaya ka sa 'yong naging hakbang
Malaki man ang naging kapalit at kabayaran

Pinatunayan mong wala na ngang libre sa mundong ito
Na ang lahat ng bagay na ninanais ay may katapat na halaga
Na may kailangang maging malungkot para lumigaya ang iba

Hindi madali ang 'yong ginawa
Madilim ang daan na tinahak mong mag- isa
Para lamang marating ang 'yong destinasyon-
Ang umaandap- andap na liwanag 
Bagaman para sa ilan, kapalaran mo'y naging masaklap
Maligaya ako sapagakat naabot, nahawakan at nayakap mo ang 'yong pangarap. 


DAHIL HINDI KA ISANG CONSOLATION PRIZE


Napakasarap sa pakiramdam ang tanghaling panalo
Langit ang nadarama sa pagputong ng korona
Sa pag- abot ng setro, pagbigay ng bulaklak, at pagsuot ng kapa
Walang kapantay ang sayang dulot ng palakpakan at hiyawan
Ng paulit- ulit na pagsambit at pagsigaw ng 'yong pangalan.
Hindi matatawaran ang ligayang hatid
Ng pagsampa sa entablado, pagngiti at pagkaway 
Habang isinasabit sa'yo ang gintong medalya.
Higit pa sa galak ng isang pamosong boksingero 
Sa tuwing mapatutumba niya ang kanyang katunggali, 
Walang kapantay ang tuwa sa'yong dibdib
Kapag napapatawa mo ang mga tao sa'yong paligid.
'Sandaang milyon at higit pa ang halaga
Ng 'yong salapi sa bulsa at sa kaha.
Napasusunod mo ang lahat 
Sa pag- angat lamang ng 'yong daliri at pagkumpas. 
Lumuluhod ang mga tala 
At nagbibigay- pugay ang mga Bathala. 
Ikaw ang nanalo; ikaw ang nagwagi; 
Ikaw lang, wala nang iba pa. 

Ibinigay mo sa kanya ang lahat ng premyo
Hindi mo basta lang ipinahawak ang korona
Ipinagkatiwala mo pa, ng buong puso,
Ng buong kaluluwa. 
Panay- panay ang pag- aalay mo ng bulaklak, 
Hinuhubad mo ang 'yong kapa sa kanyang harap.  
Isinangla mo ang gintong medalya para sa kanya
Inihagis mo ang setrong nawalan na ng silbi
Nilimas mo ang laman ng kaha
Sinaid hanggang sa huling barya
Namusyaw ang mga bituin sa isang iglap
Nawalan ng saysay ang 'yong mga salita
Wala nang tumatalima sa 'yong mga utos at batas
'Pagkat ikaw na ang alipin
at siya na ang iyong panginoon. 

Masaya naman raw siya kapag kasama ka niya
Pero kaya rin naman niyang mabuhay kahit na wala ka.
Hindi lang daw sa'yo umiikot ang kanyang mundo
Hindi niya hiniling na ang lahat ng mayroon ka'y isuko mo. 
Marami pa siyang nais, at mayroon pa siyang ibang gusto.
Subalit makakaya na rin daw niyang magtiis sa piling mo
Kung wala na talaga, kung wala nang iba pa.

Na sa iyo ang titulo, nag- iisa ka lang
Isuot mong muli ang korona at kapa 
Pulitin mo ang itinapon mong setro
Damputin mo sa sahig ang 'yong pagkatao
Tubusin mo ang gintong medalya
Bawiin mo ang iyong dangal at kahihiyan
Angkinin mo ang trono, at 'wag mo ng pakawalan
Dalhin mo siya sa dapat niyang kalagyan
Dahil ikaw ang Big Winner at wala nang iba pa. 
Ikaw ang Miss Universe at ikaw ang reyna
Huwag mong hayaang maging pampalubag- loob ka lang niya
Pamalit at pamatid- uhaw sa mga inaasam niyang ligaya.
Naka- jackpot siya, iyan ang isipin mo.  
Ipamukha mong ikaw ang First, Grand at Ultimate...
At hindi ikaw ang kanyang consolation prize.  

Aralin: PANG- UKOL at PANTUKOY

Ang pang-ukol ay bahagi ng pananalitang nag-uugnay sa pangngalan, panghalip, pandiwa at pang-abay na pinag-uukulan ng kilos, gawa, balak, ari o layon. 

Ang mga karaniwang pang-ukol ay: 

ng 
laban sa/kay 
sa 
hinggil sa/kay 
para sa/kay 
labag sa 
ukol sa/kay 
tungo sa 
ayon sa/kay 
mula sa 
alinsunod sa /kay 
nang may 
tungkol sa/kay 



Ang Pantukoy naman ay ang katagang ginamit sa pagpapakilala sa pangngalan. Ito ay tinatawag na Article sa wikang Ingles.

Pantukoy na Tiyak (Definite Article). Ito ang pantukoy na “ang.” Gamit ito sa pagtukoy ng isang partikular o tiyak na pangngalan.
Mga halimbawa: ang aklat, ang bata, ang kalapati, ang bundok, ang dagat.

Pantukoy na Di Tiyak (Indefinite Article). Salitang “isang” ang ginagamit na indefinite article sa Taglish o Enggalog. Nag-papahiwatig ito na ang tinutukoy ay isang hindi tiyak na pangngalan.
Halimbawa: isang bulaklak, isang araw, isang babae, isang dalaga, isang hapon, isang aklat, isang paaralan.
Pantukoy na Panao (Personal Article). Maliban sa katagang “si,” ang mga panaong pantukoy na sina, kina, at nina ay nagpapahihatig na ang tinutukoy ng mga ito ay dalawa o higit pang mga tao.
.

Aralin: PANGATNIG


PANGATNIG- ay mga kataga, salita o lipon ng mga salitya at kataga na nagpapahayag ng kaugnayan ng isang salita o kaya’y ng kaugnayan ng isang kaisipan sa kapwa kaisipan.
-          Mga kataga o salitang nag-uugnay ng dalawang salita, parirala o sugnay na pinagsunud-sunod sa pangungusap.
Mga halimbawa Ng Pangatnig: 
1. Pamukod - o pagbukod ng kaisipan. ("o", ni, man, maging at kaya) 
2. Paninsay - o magkasalungat sa kaisipan. (kahit, kung sabagay, bago, maliban, datapwat, bagaman, subalit, sukdang, habang, gayon man, samantala, bagkus) 
3. Panubali - kundisyon o di katiyakan. (kung, kung di, pag, sakali, disin, sana, kapag, saka-sakali) 
4. Pananhi - o dahilan. (dahil, gawa, paano, dangan, mangyari, kasi, sapagkat, kung kaya) 
5. Panlinaw - o nasabi na. (kung gayon, samakadwid, sa biglang sabi, alalaong baga, anupat, kaya) 
6. Panulad - (kung paano, gayun din - kung alin, iyon din - kung ano, siya rin - kung saan, doon din - kung gaano, gayun din) 
7. Panapos - o wakas. (at sa wakas, nang, upang, para kay, sa bagay na ito, sa lahat ng ito) 





Aralin: PANG- ABAY


Ang Pang-abay ay bahagi ng pananalita na nagbbibigay turing sa pandiwa, pang-uri, o kapwa pang-abay. 
Ang mga pang-abay ay nagsasabi ng kung paano, kalian, saan at gaano.

MGA URI NG PANG-ABAY

1.       Pang-abay na Pamanahon – nagsasaad kung kailan naganap o magaganap ang kilos na taglay ng pandiwa.
Ø       May pananda

Nang, sa, noon, kung, kapag, tuwing, buhat, mula, umpisa, hanggang

Hal.      1. Kailangan mo bang pumasok nang araw-araw?
            2. Tuwing pasko ay nagtitipon silang mag-anak.
            3. Umpisa bukas ay dito ka na manunuluyan.
Ø    Walang pananda
Kahapon, kangina, ngayon, mamaya, bukas, sandali,atb.
Hal.        1. Manonood kami bukas ng pambansang pagtatanghal ng   
               dulang Pilipino.
              2. Ipagdiriwang ngayon ng ating pangulo ang kanyang ika – 40  
                       na kaarawan.
Ø       Nagsasaad ng dalas
Araw-araw, tuwing umaga,taun-taon atb.
Hal.      1. Tuwing Mayo ay nagdaraos kami sa aming pook ng
              santakrusan.
            2. Nag-eehersiyo siya tuwing umaga upang mapanatili ang
              kanyang kalusugan.

2.       Pang-abay na panlunan – tumutukoy sa pook na pinangyarihan, o pangyayarihan ng kilos sa pandiwa. Karaniwang ginagamit ang pariralang sa/kay .
Sa – ginagamit kapag ang kasunod ay pangngalang pambalana o
panghalip.
Kay /kina – ginagamit kapag ang kasunod ay pangngalang
pantanging ngalan ng tao.
Hal.      1. Maraming masasarap na ulam ang itinitinda sa kantina.
            2. Nagpaluto ako kina aling Ingga ng masarap ng keyk  para sa
              iyong kaarawan.
       
3.       Pang-abay na pamaraan – naglalarawan kung paano naganap,
nagaganap, o magaganap ang kilos na ipinahahayag ng pandiwa.
Ginagamit ang panandang nang o na/-ng.
            Hal.      1. Kinamayan niya ako nang mahigpit.
                        2. Bakit siya umalis na umiiyak?
                        3. Tumawa siyang parang sira ang isip.

4.       Pang-abay na pang-agam – nagbabadya ng di-katiyakan sa pagganap
sa kilos ng pandiwa. Mga halimbawa: marahil, siguro, tila, baka, wari, atb.
      Hal.      1. Marami na marahil ang nakabalita tungkol sa desisyon ng
                   Sandiganbayan.
                  2. Higit sigurong marami ang dadalo ngayon sa Ateneo Home
                  Coming kaysa nakaraang taon.
                  3. Tila patuloy na ang pag-unlad ng turismo sa Pilipinas.

5.       Pang-abay na panang-ayon – nagsasaad ng pagsang-ayon. Hal. Oo, 
     opo, tunay, sadya, talaga, atb.
            Hal.      1. Oo,asahan mo ang aking tulong.
                        2. Talagang mabilis ang pag-unlad ng bayan.
                        3. Sadyang malaki ang ipinagbago mo.

6.       Pang-abay na pananggi – nag-sasaad ng pagtanggi, tulad ng hindi/di at ayaw.
Hal.      1. Hindi pa lubusang nagagamot ang kanser.
            2. Ngunit marami parin ang ayaw tumigil sa paninigarilyo.

7.       Pang-abay na panggaano o pampanukat – nagsasaad ng timbang o sukat. Sumasagot sa tanong na  gaano o magkano.
Hal.      1. Tumaba ako nang limang libra .
            2. Tumagal nang isang oras ang operasyon.

8.       Pang-abay na pamitagan – nagsasad ng paggalang.
Hal.      1. Kailan po kayo uuwi?
            2. Opo, aakyat na po ako.



Aralin: PANG- URI



Ang Pang- uri ay bahagi ng panalita na naglalarawan o tumuturing sa pangngalan o panghalip.


Uri ng pang-uri
May tatlong uri ang mga pang-uri. Ito ay ang mga sumusunod:
  1. Pang-uring naglalarawan - Nagpapakilala ng uri o kabagayan ng isang pangngalan o panghalip.
  2. Pang-uring pamilang - Nagpapakita ng bilang ng pangngalan o panghalip.
  3. Pamilang na patakaran o kardinal - ginagamit sa pagbilang o sa pagsasaad ng dami
Kardinal na pamahagi - ginagamit kung may kabuuang binabahagi o pinaghahati-hati.
Kardinal na palansak o papangkat-pangkat - nagsasaad ng bukod sa pagsasama-sama ng anumang bilang, tulad ng tao, bagay, pook atbp.
Kardinal na pahalaga - nagsasaad ng halaga ng mga bagay.
  1. Pamilang na panunuran o ordinal - ginagamit sa pagpapahayag ng pagkakasunud-sunod ng tao, bagay, hayop, lugar at gawain. May panlapi itong ika- o pang-.

Kaantasan ng pang-uri

Ang tatlong kaantasan ng pang-uri ay:
  1. Lantay-naglalarawan ang pang-uring lantay ng isang pangngalan o panghalip na walang pinaghahambingan.
  2. Pahambing-nagtutulad ang pahambing sa dalawa o higit pang pangngalan o panghalip.
  3. Pasukdol-ang pasukdol ay katangiang namumukod o nagngingibabaw sa lahat ng pinaghahambingan.