Sabihin mo Lang

Ang gusto mo ba ‘yung mukhang artista?

‘Yung maganda ang katawan, matangkad at maporma?

‘Yung sa bawat paglakad maraming matang sumusunod?

Paniwalaan mo ko, mahihirapan ka.

Baka magkaroon ka pa ng maraming kaagaw

Kung mayroon mang ganoong lalaki, 
Pipila ka pa nang mahaba.

Pare- pareho lang naman, di ba?

Kasi lahat ng tao talagang “may itsura”.

Kaya ko rin namang maligo, magpagupit at mag- ahit.

Sabihin mo lang, sabihin mo lang.

Matalino ba kamo ang hanap mo?

‘Yung tipong kumakain ng libro 
Sa umaga, tanghali at sa gabi.

‘Yung parang  laging makikipagdebate.
Na ang akala niya kaya niyang 
Paikutin ang mundo sa mga palad niya.

Na para bang siya lang ang sentro, 
Ang alpha at ang omega.

Baka hindi kayo maging masaya.

Hindi ‘yun magpapatalo sa mga argumento.

Baka maramdaman mo lang 
Na mababang uring nilalang ka.

Sapat na ‘yung may sapat na dunong

Mas maigi rin kung magaling dumiskarte

Pero kakayanin ko rin namang mag- aral ulit

Sabihin mo lang, sabihin mo lang.

Mabait ba dapat?

Palangiti, palabati at masayahin.

Kasi nga ayaw mong lagi kayong mag-aaway.

Hindi ka sanay sa hiyawan at sigawan.

Naririndi ka sa masyadong maraming usapan.

Pero hindi ka naman siguro 
Naghahanap ng anghel o ng santo,  di ba?

At wala ka rin naman sigurong balak magmahal ng pari?

May sasabihin ako sa’yo,

Hindi rin maganda ‘yung sobrang matino.

Kasama sa buhay ang kaunting pagkakamali

Bahagi  ng bawat tao ang kanyang kapintasan.

Mas mainam kung sa bawat pagtatalong mangyayari, mapapatawad n’yo ang isa’t isa

Dahil may pagmamahal, pang- unawa at pagtanggap na.

Nakakainip din ang labis na katahimikan

Minsan kailangan talaga ng kahit kaunting gulo

At may mga pagkakamaling madadaan sa pagtawa.

Pero...kaya ko namang ayusin ang ugali ko.

Sasamahan din kita laging magsimba.

Sabihin mo lang ha, sabihin mo lang.

Walang problema sa paghihintay

Sa’yo, sa desisyon mo.

Hindi naman masama ang mag- abang pansamantala.

Hindi rin kita pwedeng sisihin

Ako naman ang pumili nito

Kahit hindi ko pinangarap maging gwardiya at magbantay

Hindi ako nagrereklamo

Pero sana hindi rin ganoon katagal

At  huwag sanang maging magulo at malabo

Alam nating nakakatuwa ang maghabulan

Pero huwag naman nating gawin ‘ to sa maghapon

Magsabi ka ha

Kung itutuloy pa o titigil na.

Mahirap din ‘yung panay iling, tango at ngiti ka lang.

Kung ayawan na, ihihinto natin ang larong ito.

Basta sabihin mo lang, sabihin mo lang.