Pumili ka ng trabahong tutugon sa iyong hilig upang higit kang pakinabangan ng iyong bayan.
- Gregoria de Jesus

Tuesday, March 9, 2010

Pagtatapat isinulat ni Roberto Ofanda Umil

Hindi ka ngayon lamang
Makakarinig ng aking pagtatapat.
Ikaw na ang kalapating
Kasama kong nabasbasan
Mula sa puting kampana
Sa taas ng cake,
Ay ikinasal
Sa aking mga pangarap.

Hindi ka ngayon lamang
Nakahawak-kamay sa pamamasyal.
Ikaw na hindi nagdamot
Ng panahon at bagwis
Mula sa Kristyanong pagbibigkis
Sa gitna ng pagkawalay,
Ay kasalo
Sa mga tagumpay na nakakamit.

Hindi ka ngayon lamang
Naiyakan sa balikat.
Ikaw na insprasyon
Sa pagplano't pagtupad
Mula sa hamon ng syudad
Sa pagunlad ng makina,
Ay lakas
Sa aking mga panghihina.

Ikaw na nagpasuso
Sa ating mga anak
Mula sa dignidad ng tradisyon
Sa tangi ng pagbati,
Ay nagtiwala
Sa aking pagtango.

Kumukuha ka na naman ng panyo
Para ang 'yong pisngi ay matuyo.

Ngayon mo lamang
Narinig ang aking pagtatapat-

Na sa iyo ay di ako naging tapat.